"Menn eru taldir misjafnir, ég er talinn mjög sérvitur. Kúnstugur bara." (Sverrir Hermannsson safnari).
Hann safnaði öllu milli himins og jarðar og er það einkenni Smámunasafns Sverris Hermannssonar. Það er í senn minjasafn, landbúnaðarsafn, verkfærasafn, búsáhaldasafn, naglasafn, járnsmíðasafn, lyklasafn og meira til. Framsetningin er einkar skemmtileg og ljóst að Sverrir hefur haft ákveðinn húmor fyrir sjálfum sér og safnaáráttu sinni.