Eyjafjarðarsveit Norðurland - North Iceland

Það er rekinn öflugur landbúnaður í Eyjafjarðarsveit og meðal annars er að finna í sveitarfélaginu eitt stærsta mjólkurframleiðslubú landsins. Nálægðin við þéttbýlið á Akureyri gerir að verkum að margir íbúa sveitarfélagsins vinna við ýmis störf á Akureyri eða annars staðar og því má segja að Eyjafjarðarsveit sé sveitarfélag sem bæði bjóði kosti hins klassíska sveitasamfélags og um leið eiginleika þéttbýlis.

Ásókn í byggingarlóðir í sveitarfélaginu hefur farið vaxandi á undanförnum árum og hefur henni verið mætt af einstökum landeigendum og sveitarfélaginu með skipulagi nýrra byggingarsvæða sem sum hver eru nú þegar komin í byggingu.

Sveitarstjórn Eyjafjarðarsveitar leggur áherslu á í störfum sínum að veita íbúum sínum góða þjónustu á öllum sviðum og hlúa þannig að samfélagi sem er gott til búsetu bæði fyrir þá yngri sem og hina sem eldri eru.